الرئيسية
كلمات الاغنية
فيه ناس مساكين بقي لها سنين
لا هم اموات ولا عايشين
جروح والام حلال وحرام
دموع وبقايا بني ادمين
وناس عيانه من غير عيا
وناس مدفونه بالحيا
وبين بره وبين جوه يادوبك سور
دخلت اسأل واطقس كأني بزور
لقيت عالم شمال ويمين
وناس عايشين ولا المساكين
سألت انا فين ؟؟ قالولي
في مسشفي المجانين
..
قابلت حاجات وشوفت حالات
تهز القلب من جوه
رجل مسكين فوق السعبين
يا عينى لا حول ولا قوة
ولاده ايه اللى كبرهم
شيطان المادة غيرهم
ورفعوا عليه قضية حجر
تعالوا يا ناس وشوفوا الفُجر
ولما عقله ما تحملش
صبح قاعد وحيد وحزين
وبقى واحد من المجانين
..
دخلت عنبر الحريمات
قابلت ست قد أمي
في عينها دموع ايه الموضوع
لقيت موضوعها زاد همي
قالت لي ابني شردنى
واخد الشقه وطردني
رماها يا ناس في عز البرد
ونامت ع الرصيف والارض
كانوا المجانين عليها احن
وهي معاهم بقي لها سنين
لو يتوب منها يوم الديــن
..
وفجأة لقيت قصادي إنسان
قلولي ده كان صاحب عزوة
وملو نفوس صبح مغموس
وكله ضاع علشان نســوة
عشق بنت في مقام بنته
علشانها باع اللي حيلته
ولما ضاع وما لقاش حل
ومد ايه يا ناس وانزّل
فقد عقله وعجز وإنشل
واهو مرمي بقاله سنيـن
وتــاه عقله مع التايهيـن
..
سمعت هناك ورا الشباك صريخ
من بنت حابسينها
خطيبها كان زين الشبان
لكن قتلوه قصاد عينهـا
خمس شبان من سنُه
وحاولو يخطفوها منه
دافع عنها ومعوش حد
وطبعا هما كانوا أشد
ولما دموا ساح ع الأرض
بقت تطلم علي الخديــن
بقت بتصرخ شمال ويمين
..
مشيت قدام سمعت كلام تعبني وشل تفكيري
شاب حزين لكن مسكين بيضحك ضحك هيستيري
ده كان عنده يا ناس طفلة
راحت من ايدوا ع غفلة
خطفها وأغتصبها ندل
وكملها بجريمة قتل
ومهما خد بتارها العدل
ده هيفيدو بإيه المسكين
دي كانت نور عينه الإثنين
..
فيه ناس يا ناس بتأذي الناس
تحس بمتعة وبلذة
لا هم عاقليين ولا مجانين
دي خلقة او شاذة
بقيـنا في منتهى القسوى
في دنيـا فانيـة ولا تسوى
وضاع منا خلاص الحق
وعايشين للحسد والنق
بقينا فنجرية بــُق
وفي الآخر يا بني ادميين
بنتريق ع المجـانين
